НЕВЫЧАРПАЛЬНЫЯ НА ВОБРАЗЫ РАДКІ
------------------------------
Тым, хто прыйшоў у Дом-музей А. Міцкевіча ў апошні дзень кастрычніка, пашанцавала ўдвая. Яны не толькі сталі сведкамі адкрыцця выставы жывапісу, графікі і скульптуры, прысвечанай 215-годдзю А. Міцкевіча "Паэту - Нёманскі вянок”, але і змаглі ўжывую павесці дыялог і пазнаёміцца з групай вядомых мастакоў і скульптараў Беларусі.
Свае творчыя работы на суд грамадскасці Навагрудка прадставілі актывісты творча-асветніцкага праекта "Выток Нёмана - выток духоўнасці" Леанід Гоманаў, Фёдар
Ладуцька, Андрэй Лычкоўскі, Мікалай Мішчанка, Яўген Шунэйка, Марына Эльяшэвіч, Алесь і Яраслаў Філіповічы.
Гэтыя творчыя людзі, у асноўным жыхары Мінска, Узды і Гродна, некалькі гадоў назад аб'ядналіся ў мастацкую суполку і ладзяць сваю дзейнасць пад патранажам Уздзенскага гісторыка-краязнаўчага музея.
Там абуладкавана і пастаянна дзейнічае галерэя з твораў аўтараў, якія яны падарылі музею. Творчыя выставы мастакоў у свой час былі арганізаваны ў музеях Мінска, Салігорска, Нясвіжа і г.д.
Ідэя арганізацыі выстаў у розных гарадах Беларусі нарадзілася не выпадкова. Як патлумачыў адзін з аўтараў работ, мастацтвазнаўца,прафесар Акадэміі мастацтваў Яўген Шунэйка, мастакі і скульптары зацікаўлены ў прапагандзе сваёй працы.
Не кожны чалавек можа прыехаць і наведаць музеі Мінска, каб пазнаёміцца з іх творчасцю. Таму актывісты праекта выпрацавалі маршрут і па магчымасці робяць вандроўкі са сваімі работамі ў маленькія гарады краіны.
Як было адзначана вышэй, у Навагрудак творчых людзей прывяла юбілейная дата вядомага паэта А.Міцкевіча. Экспанаваныя творы маюць вельмі разнастайны характар.
Тут, акрамя пейзажаў і нацюрмортаў, прадстаўлены і
гістарычныя жанры. Большасць карцін напісана з натуры і зусім нядаўна. Работы захапляюць сваёй неардынарнасцю, вобразнасцю і чысцінёй. Па словах Яўгена Шунэйкі, у кожнай карціне ёсць таямніца.
Мастак падчас працы заўсёды нешта закладвае ў сваю работу. Задача крытыкаў і простых гледачоў убачыць гэта. I цікава, што часам звычайны чалавек падчас знаёмства з работай мастака можа ўбачыць там больш за самога аўтара і ахарактарызаваць убачанае зусім з нечаканага боку.
Гэта толькі падкрэслівае каларытнасць і глыбіню працы мастака, яго прафесіяналізм і творчы падыход.
Далей Яўген Шунэйка пазнаёміў прысутных з тэхнікай работ сваіх калег. У прыватнасці, М. Мішчанка непараўнальны аўтар, які працуе ў тэхніцы акварэлі. Л.Гоманаў і А. Лычкоўскі малююць цудоўныя пейзажы. Ф.Ладуцька - знаўца алейнага жывапісу і пастэлі. М. Эльяшэвіч выдатна валодае тэхнікай тушавага жывапісу на кітайскай паперы. А. Філіповіч не раўнадушны да гістарычнага мінулага Беларусі. Менавіта гэтай тэме ён і прысвяціў свае творы. Хто завітае на выставу, абавязкова прыпыніцеся каля яго кампазіцыі "Абуджэнне".
Ацаніце і скульптуры Я.Філіповіча "Ветрык" і "Прарок".
Некаторыя аўтары шчыра прызналіся, што на Навагрудчыне шмат мясцін для натхнення і творчасці. I не дзіўна, што А. Міцкевіч на прынёманскіх прасторах, на чароўным беразе возера Свіцязь развіў свой талент і стаў вядомым паэтам.
Цяпер з твораў Міцкевіча мастакі і скульптары чэрпаюць ідэі і вобразы для сваіх работ. Асабліва натхняльнай з'яўляецца паэма "Пан Тадэвуш". Па прызнаннях Алеся Філіповіча, ён яе перачытаў ужо некалькі разоў. I кожны раз адшуквае там новыя тэмы для творчасці.
Падчас адкрыцця выставы актывісты творча-асветніцкага праекта падарылі музею А. Міцкевіча ўнікальнае выданне 1840-х гг. Гэта зборнік лекцый пра славянскую літаратуру, які быў выдадзены ў Францыі на польскай мове. Ён прысвечаны гісторыі славянства.
Pisma Adama Mickiewicza. Tom VIII. - Warszawa, 1858. - лекцыі Адама Міцкевіча ў Каледж Дэ Франс 1841-1843 гг.
Унікальнае выданне выпадкова адшукаў у інтэрнэце на аўкцыёне малады ўздзенскі гісторык Павел Апановіч. Паведаміў аб сваёй знаходцы актывістам праекта. Мастакі сабралі патрэбную колькасць сродкаў і купілі каштоўную кнігу. Павел Апановіч перадаў кнігу дырэктару Дома-музея А. Міцкевіча М. Гайбе і расказаў пра вялікую ролю паэта ў эміграцыі для прапаганды нашай нацыянальнай культуры.
У адкрыцці выставы браў удзел вядомы мастак Беларусі, наш зямляк Кастусь Качан. Ён шчыра вітаў сваіх калег на Навагрудчыне і заклікаў да супрацоўніцтва.
Выстава ў Доме-музеі А. Міцкевіча будзе дзейнічаць на працягу лістапада. Адшукайце, калі ласка час, загляніце на яе. Дакраніцеся да прыгожага, адпачніце душой, атрымайце асалоду ад убачанага!
К. БЕСАРАБ, "Новае жыццё"